Bau Kembang Melati Di Dalam Taksi

Ayo Ketawa! - Malem Jumat, ujan gerimis. Jarum arloji bang Juki nunjuk ke arah jam 10.

"Eeet dah," kate bang Juki, "Sepi amat ye penumpang..."

Akhirnye taksi diparkir ame bang Juki gak begitu jauh dari pasar karawaci. Kire-kire setengah jem lamenye nunggu, tau-tau ade ibu-ibu bawa bungkusan gede ngetok-ngetok jendela taksi.

"Bang...bang...", katenye sembari buka pintu, Anterin saye ke TPU (Pekuburan) Cisauk..."

"Beres, mpok," kate bang Juki.

Pas di jalan sepi ke arah cisauk, bang Juki nyium bau kembang melati nyang santer banget. Jelas die grogi sampe taksinye jadi kaga teteg jalannye.

"Kenape, bang...?" tanye si penumpang, Abang ketakutan ye...?"

"Ah enggak, mpok," jawab bang Juki asal jeplak.

Tempat nyang dituju, TPU Cisauk, makin deket. Kire-kire due ratus meter lagi. Bau kembang melati tambah nyaring.

Sebentar-bentar bang Juki ngeliat ke arah kaca spion atas. Die mulain ketakutan. Keringet dinginnye mulain keluar.

"Kenape, bang..." tanye si ibu, "Abang kok ngeliatin saye aje? Awas ye ntar kalo udeh sampe..."

Ngedenger omongan si ibu, bang Juki jadi tambah ketakutan. Die mulain gemeteran. Taksi jalannye rade ngaco. Untung aje jalanan udeh sepi banget.

Si ibu tau-tau nepak pundak bang Juki, "Hei, udeh sampe," katenye. Pas banget di pinggir areal kuburan. Cume ade dua rumah.

Bang Juki ketelepasan. Die tereak minta tolong. "Supir taksi kurang ajar," bentak si ibu sembari narik kenceng pintu depan.

"Supir taksi brengsek, lo. Berape duit ongkosnye ...hah...??! Elo kire gue kuntilanak ye.... pake ketakutan segale....Rumah gue emang di deket kuburan... gue emang belanje kembang melati... tapi gue bukan kuntilanak. Gue tukang rias penganten. Tau gak.....?!! Gue belanje kembang malem Jumat supaye besok siang udeh bisa gue pake ngerias penganten..... Dasar supir taksi bego...?!!"

Bang Juki diem aje. Die terlanjur ketakutan. Jelas die kagak bisa narik lagi rase takutnye nyang emang udeh ketelanjuran. (www.ayoketawa.com)